論壇

    「呢度……喺邊度嚟？」青年雙目逐漸睜開「我嚟咗異世界？」佢慢慢起身觀察周圍，發現自己處於荒山野嶺，有喺前世見唔到嘅植物，空氣亦都好唔同，特別清爽。

   「我咩衫都冇全裸，屌呀。」佢係度抱怨冇衫著同一時間，發現身體有異樣「……我咁樣點行路呀。」咁樣講身體就開始有變化，變得稍為正常少少「好彩可以縮埋……」

    佢再望下自己身體「好在係有得調節嘅啫，身體變到咁樣……我己經唔係人，又有鱗片、又有翼、有條尾、啲手手腳腳仲成隻爪咁樣……成隻龍人咁樣……唯獨塊面係人樣。」

    「對翼同埋條尾可以收埋，隻手同埋腳仲有啲鱗片。」而家佢嘅身體睇上去比較似一個人。

    周圍環境同青年所認識嘅大自然唔同，比較起佢所認識嘅綠色自然，呢度似係畫家用盡一切辦法用最鮮豔，但又唔會失真描繪嘅虛構大自然，有外星般植物，天空有不只青藍，周圍有唔同動物面貌。

    青年將目光轉移到佢嘅腳下「呢啲鱗片厚到幫我整咗對鞋，好事嚟嘅。」 周圍探索呢片異常鮮艷大自然，係呢個時候，佢停低咗腳步，抬頭望住個天「嚟到異世界就唔會用之前嘅名……普頓，而家我嘅名係普頓・戴・雷瑟。」 

    荒山野嶺生存從劈樹開始，佢附近見到一嚿大石頭，輕而易舉單手就攞起咗石頭，佢好驚訝「唔只係外貌變化，而係真係有實質身體體能上嘅變化……」佢望咗一下身後嘅翅膀，「唔通我……可以……飛？暫時唔好理呢啲住，我要整工具先。」

    用咗啲時間佢搵到一棵大小適中嘅樹，普頓由單手改為雙手舉起石頭，佢然後用力一掉，嘭！石頭撞爛咗一部分，樹幹直接斷咗一部分，仲有部分係黐住，但亦都好快承受唔住發出依──依依聲，樹幹應聲倒地……「我冇諗會咁大力，不過係唔使掉咁多下嘅情況底下算好。」

    佢用石頭撞爛咗嗰一部分嚟打側支，側支係一啲粗嘅樹枝，大小適合做石斧握把。 用小石頭打個窿落打到咁上下，然後搵咗相對薄少少嘅石頭，之後搵咗一個比較粗嚡嘅石頭用嚟磨刀刃。佢喺度諗，要點樣先可以用盡曬啲木整工具？

    突然有黑洞出現！嚇到普頓仆咗落地，驚嚇令佢忘記疼痛，指住黑洞話：「點解會有黑洞！」、「但係佢冇吸我入去，唔通呢個係……」 佢嘗試將成條樹幹掉落去個「黑洞」裏面， 然後心裏面諗「唔用」，個「黑洞」消失咗。

    普頓佢就明白啦「原來係空間袋……我相信異世界第一個發現空間袋嘅人，反應應該係咁？啲書入面描述都只不過係個魔法陣，又或者一個黑色嘅盒，現實見到咁嘅嘢真好恐怖，比望住超現實主義油畫更加嘔心。」、「不過真係好大力！異世界嘅人全部都係怪物。」佢心裏面咁樣諗。

    一諗到異世界就點解會忘記魔法，究竟係點樣先發動到。想像力腦補？有公式可尋？定身體本身就已經識？保持住呢啲疑問，佢開始尋找方法嚟用魔法。

    心中諗起以前好鍾意，好型嘅魔法……嘅元素，喺普頓諗緊啲嘢嘅時候，佢嘅雙眼係合埋咗。

    佢聽到一啲動靜「……得咗嚇？」擘大返對眼嘅時候，佢唔知點講好，有十個唔同屬性嘅球出現咗。「一下子就有十個唔同屬性……火、水、土、岩、金屬、木、風、光、黑、同埋純粹的魔力，就咁睇落去就係呢十個。」佢望咗一下呢球，再望下自已「我都唔知係呢度自已係正常定唔正常。」

    「睇嚟係身體本來就識同埋想像力……一個身體充滿魔力並且強壯嘅畫家，喺呢個世界係無撚敵，」普頓望住嗰十個球，有感而發將佢哋全部掉曬去大石，「唔知我而家嘅威力會幾大呢？」轟呀，大石化咗灰。

    「……集中用一個屬性，威力應該會更大，」望住佢自己嘅手咁樣講「仲有一樣嘢要知道，打落目標個效果會冇咗定係會保留效果？一個水球打落去個人度，個人會係永久濕咗，然後食咗個衝擊？定係食咗個水球嘅衝擊，隨著魔力消散會乾？」

    「如果係永久濕咗嘅話，我連掘礦都唔需要，好似頭先咁樣再諗下形狀，直接金屬道具入手。」佢一諗咁即刻好興奮。

    經過一番實驗，要整到法術要永久保留，唔需要魔力維持法術，係要好多魔力。喺憑空整一粒金屬珠，意外發現自己可以感應用咗幾多，頭先嗰十個屬性珠唔係用咗好多百分一都唔知有冇，但係整一粒金屬珠居然係用咗佢十分一魔力。「諗下都合理，而家係用法術創造一嚿嘢，唔係喺度維持法術直到打中人嗰刻，要用多啲魔力係正常。」

    「如果魔力唔係鎖死得咁多，而係可以鍛鍊獲取更多，咁樣長命魔物應該係最恐怖……唔係，應該係話長命就係恐怖。」望住手上嘅金屬珠有感而發。

    做完一輪實驗之後，整咗一啲好基礎嘅法術， 每個屬性嘅乜乜球、乜刀、乜乜刃，劈咗幾棵樹，整多咗石鏟同把石刀，然後擺咗落空間袋。

    跟住，普頓就搵緊動物或者魔物打獵，最主要係想攞到素材整返衫褲。途中佢將一啲基礎法術威力加強，多多少少參考咗佢前世嘅一啲作品，當然啲乜嘢滅世技，佢而家整唔出嚟。常見嘅法術、又或者係佢頭先掌握到嘅屬性範圍以內就好簡單啦，但要睇住用幾多魔力，用到冇曬都唔知發生咩事。而家乜嘢都冇，無保護措施就唔好作死做身體實驗。

    唔使好耐，普頓就見到三隻狼，睇落去都正正常常，不過相比前世嘅狼，呢度幾乎係兩三倍。毛髮炭一樣咁黑，外觀亦都好兇狠，雙眼純黃唔存在瞳孔。

    「為咗素材，我唔會用火同埋電，即使係燒一下、電一下都唔知會唔會燒曬啲素材，搞到咩嘢都唔用得，」「我冇咁好心同佢哋打消耗戰，尤其係而家乜防具都冇嘅情況底下。」

    「隱身、追蹤風刃球……」普頓先用隱身，魔力覆蓋全身，等一陣魔力就會對環境作出反應並生成為迷彩，除此之外做動作唔會發出聲音，但如果發出聲音過大就需要用更多魔力嚟吸走聲音。喺呢度佢只係企喺度同埋掉啲風刃球出去，所以需要用嘅魔力唔係好多，之後佢要做嘅野，就係要控制呢啲風刃球直接斬首狼頭。

    「……！係而家。」普頓好精準咁掉咗風刃球喺狼群頭頂，依家風刃球空中，普頓控制球嘅軌跡，成功斬殺一隻，符唦──啪──！睇到同伴個頭跌咗落嚟，佢哋反應即刻好快，不過喺啱啱死咗嗰隻，企隔離嘅狼避唔切食埋個風刃球，重創但未死。

    「要沖，如果唔係就畀佢哋其中一隻走甩！」即刻用風刃，處理咗啱啱重創個隻，淨返一隻，「你唔好諗住走呀！」一下子跑到隻狼面前，雙手捉住狼頭然後用風刃，成個頭變咗肉碎。

    「成身都係血……頂唔順成身血。」用完水球術洗身「好，素材係有……但我唔識剝皮同切肉……」，「咁整用具先，印像中屠宰都係掛喺勾，切肉分件，我整繩先。」 刮下之前採集木頭上嘅樹皮， 用水球術浸水，浸水變軟之後用啲樹皮捲捲捲。

    「懵咗，用法術畀佢自己捲咪得囉，又或者用工具，做咩我自己一個用人手捲。」突然間感到自已智力下降，難免會令普頓有啲唔開心，不過都冇時間畀佢唔開心，佢要盡快整衫褲、食嘢同埋搵個地方做營地瞓覺。

    經過三個鐘努力，由好多條幼細樹皮，變成有三隻手指綁埋咁粗一條幾米長嘅繩。「唔知係咪我修煉法術未夠班， 我唔可以做到同時用兩個法術。」 抹咗頭上洪水般汗水咁樣講到「睇嚟法術都好考體能，整條繩都係搞到我滿頭大汗……」

    普頓嘅諗法係想整條繩剪開分兩條、整兩個滑輪，滑輪勾起樹上較粗嘅側支，狼腳部分別綁起，繩擺喺滑輪上面，一嘢拉落去！將隻狼倒吊係樹度，然後將繩綁係附近嘅樹幹，屠宰完之後解返條繩，換第二隻狼重複先前嘅步驟兩次。

    「要點樣綁，同屠宰嘅順序……啊──要拗爆頭呀！」， 眼前有一份藍色嘅透明螢光版出現「你好。」普頓望住光版話：「係救星呀，係系統面板呀！」講完呢句嘢之後繼續講道：「你有冇啲咩特別功能定係純粹面板？有陣時天就鍾意咁樣玩鳩你，整個希望然後再喺你面前摧毀。」唔知點解普頓扯遠咗話題。

    系統面板冇理到佢，繼續講佢要講嘅嘢「我係嚟幫你，我冇咩特別獎勵嘢可以畀你做，你想我幫到手，你自己都要做越多嘢，嘗試你要做嘅嘢，我先可以畀到你相對應嘅幫助。」

    「你做咗唔少野，而家遇到麻煩我可以幫到你，屠宰同處理素材流程嘅知識已經畀咗你，自己去睇下。」系統面板講完嘢就消失咗，「多……多謝。」普頓感謝完後召喚系統面板，睇返系統畀佢嘅知識。

    裏面有教唔同嘅繩綁法、點樣剝皮屠宰，但呢個唔係重點，重點面板俾嘅係成套流程同成套知識，而唔係話針對目前情況畀知識。雖然話係成套，但係其實都係有啲缺少咗，多少有啲簡略，濃縮……係啦，冇錯濃縮版。

    當普頓想剝皮屠宰，喺佢眼前係數個箭咀同埋虛線「的確只係知識， 呢啲箭咀同虛線係好好嘅輔助……估唔到，之前都做唔到智能工業，而家做到。」佢笑住講道。綁起狼，然後吊起，用水球術洗一洗。狼身上嘅汙垢一一去除，小心處理內臟避免喺內部汙染肉，導致食物中毒。

    咁又一個鐘，剝皮同分件，三隻狼終於全部屠宰完，回收返啲繩同滑輪，狼肉擺咗入空間袋，皮就用嚟做咗衫褲。普頓亦都整多咗把石刀，專門用嚟切熟野。

    「人手做咗咁多嘢先肚餓，現代有自動化真係好，如果淨係輔助人就非常好，但全部工作都取代生活會唔會真係咁如意……」普頓依家打算整細細間木屋，暫時住住先。斬幾棵粗樹當樑柱，百幾棵細樹當牆，樑柱有榫口位，牆壁嘅細樹頭同尾削出榫卯，砌積木咁樣。 屋頂開一個窿俾煙通，煙囪用石頭同泥堆砌而成。

    因為有法術唔駛用咁多時間搵材料，建造時間快好多，用咗一個半鐘，啱啱好太陽落山之前起好。

    二話不說，佢要煮嘢食佢好肚餓，即刻將屠宰咗狼肉再切，切成排狀同時間亦都切肥肉攞嚟做油，肥肉擺落石板，稍為晃動就化為油脂，即刻掉狼肉煎，每十幾秒反就一次，總共反咗十幾次，咁就啱啱好大概三分鐘， 雖然塊排只係煎咗三分鐘，但都算熟咗。

    「石板煎狼肉野味！完成！」望住啱啱煎好嘅狼肉，等咗幾分鐘令肉變得更加鮮嫩同埋冇咁熱，理應再等耐啲攤凍少少，但等唔切，唔理咁多普頓已經狼吞虎嚥食曬。「嘩……好好食……」佢講完呢句，疲勞就搵上門，普頓都唔理咁多，佢要瞓覺！用所剩無幾嘅精神，佢慢慢攤落地板入睡瞓覺。